ԱՄՆ-ի գերագույն դատարանը չեղարկել է հղիության արհեստական ընդհատման օրինականության մասին 50 տարվա վաղեմություն ունեցող վճիռը: Այս որոշման համաձայն՝ ԱՄՆ-ում կփոխվի հղիության արհեստական ընդհատման իրավունքը և այսուհետ նահանգները կորոշեն դրա օրինականությունը կամ արգելված լինելը:
Դատարանի վճիռի համաձայն, ԱՄՆ-ի Սահմանադրության մեջ չի նշվել աբորտի իրավունքի մասին։ Գերագույն դատարանի վճիռի համաձայն, հղիության արհեստական ընդհատման վերաբերյալ որոշումն այժմ ԱՄՆ -ի նահանգների լիազորությունն է համարվում և ակնկալվում է, որ ԱՄՆ-ի 50 նահանգներից կեսը այս կապակցությամբ արգելքներ կամ սահմանափակություններ կսահմանեն:
Նախագահ Ջո Բայդենը վճիռն անվանել է աղետալի սխալ և շեշտել, որ իր կարծիքով՝ այս որոշումը ծայրահեղական գաղափարախոսության իրականացում է և ցավալի սխալ:
ԱՄՆ-ում, հղիության արհեստական ընդհատման հարցը մշտապես եղել է լիբերալների և պահպանողականների թեժ քննարկումների առարկան:
Թեև Գերագույն դատարանը 1973 թվականին որոշում կայացրեց, որ ԱՄՆ-ի Սահմանադրությունը պաշտպանում է կանանց ազատությունը՝ առանց պետական սահմանափակումների աբորտներ կատարելու հարցում, սակայն այդ որոշումը միշտ եղել է խնդրահարույց:
Աբորտի հակառակորդները այս որոշումը համարում են հաղթանակ կյանքի իրավունքի պահպանման հարցում:
Ներկայացուցիչների պալատի հանրապետական պատգամավոր Ալիս Ստեֆանիկն ասել է.«Գերագույն դատարանի պատմական որոշումը կյանքի իրավունքի հաղթանակ է, և այն կփրկի անթիվ անմեղ երեխաների կյանքեր»:
Սակայն աբորտի ազատության կողմնակիցները կարծում են, որ հղիության արհեստական ընդհատումը անձնական խնդիր է և պետք է կիրառվի՝ կանանց իրավունքները ճանաչելու համար:
ԱՄՆ-ի Ներկայացուցիչների պալատի խոսնակ Նենսի Փելոսին դաժան և սրտաճմլիկ է անվանել «Ռոհը Ուեյդի դեմ» գործով պատմական վճիռը չեղարկելու որոշումը:
Աբորտի ազատության իրավունքի սահմանափակումը դարձել է ԱՄՆ-ի հասարակության հիմնական քաղաքական և սոցիալական մարտահրավերը: Որոշումը, հատկապես նոյեմբերի միջանկյալ ընտրություններին նախորդող ժամանակաշրջանում, կխորացնի քաղաքական վեճերը ։
Դեմոկրատները ձգտում են աբորտի ազատության կողմնակիցներին աջակցելով մեծացնել նոյեմբերի միջանկյալ ընտրություններում իրենց հաղթանակի հնարավորությունը, մինչդեռ հանրապետականները Գերագույն դատարանի որոշումը համարում են քաղաքական մեծ հաղթանակ, որը կարող է ճանապարհ հարթել ընտրություններում հաջողության հասնելու համար:
Միևնույն ժամանակ, ներկայումս իրավական վեճ կա դաշնային կառավարության և Միացյալ Նահանգների որոշ պահպանողական նահանգների միջև: Այս նահանգներն ընդգծում են, որ աբորտի օրինական լինել-չլինելու հարցը նահանգային խնդիր է, և դաշնային կառավարությունն իրավունք չունի միջամտել։ Մինչդեռ Վաշինգտոնի դեմոկրատական կառավարությունը շեշտում է, որ աբորտն ԱՄՆ-ի քաղաքացիների հիմնարար իրավունքն է, և դաշնային կառավարությունը պարտավոր է պաշտպանել այն։
Ամեն դեպքում, ԱՄՆ-ի գերագույն դատարանի որոշումը քաղաքական մեծ փոթորիկ է բարձրացրել այդ երկրում, և հավանաբար վերածվելու է պահպանողականների և լիբերալների միջև ամենալուրջ գաղափարական առճակատումներից մեկին վերածվի, սրելով անկայունությունը և հրահրելով անկարգություններ: